Preek 27 Oktober 2013

Dankbaarheidsfees

Lukas 17: 11-19

Ek wil begin met ‘n storie. Lank, lank gelede het God sy 2 hoofengele ingeroep om vir hulle ‘n baie spesiale taak te gee. God het vir hulle baie mooi verduidelik wat hulle moes gaan doen. Hulle moes aarde toe gaan en Gabriël moes al die dankie-sê gebede bymekaar maak en terugbring. Migael moes al die asseblief-Here gebede bymekaarmaak en terug bring.

Hulle is toe daar weg, elkeen met ‘n mandjie om die gebede te gaan haal. Gabriël wat die dankie-sê gebede bymekaar moes maak het ‘n baie groot mandjie saamgevat.

Hy het vir Migael gesê: “ek vat die grootste mandjie saam, want God is mos baie goed vir die mense, so ek dink my mandjie gaan oorloop van al die dankie-sê gebede”.

Migael antwoord toe: “ek stem saam, daarom neem ek ‘n kleiner mandjie saam. God is so goed vir die mense, hulle sal sekerlik nie baie vir Hom vra nie.”

Hulle is toe af aarde toe. Migael het geloop en gehoor hoe die mense die een na die ander ding vir God vra. Later het sy mandjie begin oorloop van al die vra-gebede. Daar was later nie meer plek nie en hy het begin om die gebede in sy sake te steek en selfs aan sy vlerke vas te maak.

Intussen het Gabriel al meer bekommerd geraak, want sy mandjie het maar leeg gebly. Hier en daar het mense onthou om dankie te sê.  

Toe hulle terugkom in die hemel met hulle mandjies het altwee hartseer gevoel dat mense so maklik kan vergeet om vir God dankie te sê.

In die Bybel is daar ‘n storie oor mense wat vergeet het om dankie te sê vir iets wat Jesus vir hulle gedoen het. Lees Lukas 17:11-19.

Jesus genees die 10 mans van melaatsheid, maar net een van die tien kom terug om vir Jesus dankie te sê. En dis nogal die Samaritaan ook. Die Jode het neergesien op die Samaritane, maar Jesus maak die Samaritaan die held in die verhaal.

Geen wonder Jesus vra half verontwaardig: “was daar nie tien wat gesond gemaak is nie? Waar is die ander nege dan?

Ek kan net dink wat hulle verskonings was:

·         Ek wil eers sien of die genesing gaan hou

·         Ek het waarskynlik nooit eers melaatsheid gehad nie

·         Om mense te genees is mos Jesus se werk – hoekom moet ek dankie sê

·         Jesus het nie veel gedoen nie

·         Enige rabbi kon dit gedoen het

·         Ek was in elk geval besig om beter te raak

·         Ek sal later tyd maak om vir Jesus dankie te sê

Een van die eerste goed wat my ma my geleer het was om asseblief en dankie te sê. Dis vandag nog net so belangrik om dankie te sê, maar dis asof ons so maklik vergeet en so vol verskonings is. Ek dink ons is meer dikwels soos die nege wat nie omgedraai het om dankie te sê nie. In plaas daarvan dat ons soos die een is wat wel omgedraai het. Dit terwyl dankbare mense gelukkiger mense is. 

Miskien sal hierdie volgende clip ons weer herinner daaraan om dankie te sê. Eers so bietjie agtergrond. Dis deel van ‘n filmprojek genoem Everyone Matters. Dis word gedoen deur Louie Schwartzberg. Hy is baie bekend vir Time-lapse fotografie. Dis nou die fotografie waar jy byvoorbeeld blomme stadig sien oopgaan of skoenlappers sien vlieg. Dis ‘n lang proses om dit te doen. Jy moet baie geduld hê daarvoor.  

Kom ons kyk daarna: https://www.youtube.com/watch?v=4115qFsdWKQ

Neem gou ‘n oomblik en dink waarvoor is jy vanoggend dankbaar.

As jy jou gedagtes agtermekaar het - Sê dit gou vir iemand wat naby aan jou sit. Ouers en kinders, vriende, vriendelike vreemdeling of dink net op jou eie.

Gebed

Gee kans om koeverte met dankbaarheidsoffers in mandjies te gooi.

Nagmaal as teken van dankbaarheid

Preek 13 Oktober 2013

Deuteronomium 6: 4-13

Die Jode het wonderlike gebruike vir die uitlewing van hulle geloof. Een daarvan is ‘n besonderse gebed wat hulle baie gereeld bid. Die Shema. Hulle sê – as jy die shema bid dan erken jy dat God die heerser van jou lewe is.

Dan is geen gedagtes of gevoelens vir God meer weggesteek nie.

Dan is jy verseker dat God die hele dag en nag oor jou die wag sal hou.

Met die Shema erken jy ook dat reg is vir die hemel.

Die Shema kry ons in Deuteronomium 6: 4-5 “Luister, Israel, die Here is ons God, Hy is die enigste Here. Daarom moet jy die die Here jou God liefhê met hart en siel, met al jou krag.”

Daar is spesifieke tye wanneer dit gebid moet word en hoe dit gebid moet word.

Die Shema word in die sinagoges opgesê, wanneer iemand dood gaan. Daar is ook baie getuienisse waar die Shema deur Joodse martelare gebid is. Ook tydens die tweede wêreldoorlog in die konsentrasiekampe en in die gaskamers het jy dit dikwels gehoor.  

Maar dit word veral ook in hulle huise gebid.

Bid dit in die oggend wanneer dit begin lig word, maar voor die son opkom.

Bid dit in die aand voor middernag, verkieslik wanneer jy drie sterre kan sien.

Dit word ook gebid wanneer jy in die bed klim sodat jy met die woorde van die Torah op jou lippe aan die slaap raak.

Die shema word beskou as iets baie kosbaar, so jy moet dit met baie konsentrasie en ontsag en eerbied bid. Soos wanneer jy ‘n brief lees wat van ‘n koning af kom.

Jy moet ook jou oë toedruk met jou regterhand, sodat niks jou aandag aftrek nie.

Jy moet dit ook met ‘n stadige, singende stem sê, want dit beklemtoon God se liefde vir ons en ons liefde vir Hom.

Omdat hulle so ernstig is oor die Shema moet daar in hulle huise daaroor gepraat word. Dit moet vir die kinders geleer word

Daar was ook uitwendige tekens wat hulle daaraan herinner het. So word die woorde van die Shema op klein perkament rolletjies geskryf, in leerhouertjies gesit en vasgebind op jou voorkop en jou linkerhand terwyl jy die shema bid. Dis ook in houers by hulle deurkosyne geplaas. Alles sodat hulle nie vergeet wie God is en dat hulle God se kinders is nie.

Die volk is op die punt om by die beloofde land in te gaan. Hulle is onseker, hulle weet nie wat vir hulle voorlê nie. Daar is vreemde mense met allerhande vreemde gode. So in hierdie omstandighede het die Shema ‘n tweeledige doel….

·         om hulle lojaliteit en gehoorsaamheid aan God te beklemtoon – die god wat hulle uit Egipte gered het en aan hulle die 10 gebooie gegee het. 

·         Om die uniekheid van God te bevestig – hulle was in ‘n omgewing waar daar baie verskillende gode aanbid is. Die Shema bevestig dat God die enigste God is.

Die fondasie hiervan is die genade verbond wat God met Israel gesluit het. God het vir hulle gesê dat Hy hulle God is en dat hulle sy kinders is. En dit hang nie af van hoe sterk hulle geloof is of wat se goeie gelowiges hulle is nie – dis God wat die insiatief neem sonder dat hulle dit verdien. Hy belowe Hy is aan hulle verbind en dat Hy vir altyd aan hulle verbind sal bly.

So, met die shema bevestig hulle die verbond en hulle lojaliteit en gehoorsaamheid aan die verbond.

Ons het ook ‘n teken wat dieselfde doen as die shema en dis die doop. Die doop se fondasie is ook die Verbond. Dit wil ook vir ons bevestig dat God ons reeds ken voordat ons hom kan ken. Dat Hy aan ons verbind is reeds van voor ons geboorte af en aan ons verbind sal bly deur ons hele lewe. Dat Hy van altyd af vir ons lief was en vir altyd vir ons lief sal bly.

Soos die Shema herinner die doop ons aan die wonder van God. Die God wat ongelooflik geduldig en vol liefde en genade is vir sy volk en in al hulle behoeftes voorsien.

Soos die Shema herinner die doop ons dat God die enigste God is te midde van baie afgode. Ons het wel ander afgode, maar ons het ook afgode – soos materialisme, geld, sukses, prestasie, selfsug, mag. Die doop herinner ons dat ons nie moet toelaat dat enige iets anders God se plek in ons lewens moet oorneem nie.

Soos Martin Luther gesê het: “No one can have one God unless he clings to Him alone and trusts Him alone: otherwise he will be snatched off into a variety of works and will devise various gods.”    

Soos die shema is die doop ook ‘n waarskuwing dat ons nie so maklik van God moet vergeet nie. Ons raak so besig met ons daaglikse lewe dat ons maklik van God vergeet.

Ons is so besig om ons kinders te leer hoe om te oorleef in die moderne wêreld dat ons nie daarby uitkom om hulle van God te leer nie. Ons praat skaars oor God in ons huise.

Ons luister nie na God se insette as ons besig is met onderhandelings en groot besluite nie. Ons ontmoet Hom net op Sondagoggende, maar die res van die week vergeet ons van Hom. Ons soek sy hulp wanneer ons swaarkry, maar wanneer dit goed gaan dan is ons doodstil.    

Doop herinner ons weer aan die werklikheid van God in ons lewens en dat ons dit met ons kinders moet deel.

Soos die shema is die doop ook ‘n teken van hoop. Dit herinner ons daaraan dat God getrou sal bly, maak nie saak wat gebeur nie. Dis ‘n teken van hoop waarvolgens ons kan gaan lewe. Dit bevestig vir ons – “He’s got the whole world in His hands…His got you and me in His hands…”   

As ‘n herinnering dat jy gedoop is: Sit jou hand op jou voorkop en dan sê ons die shema hardop saam as ‘n geloofsbelydenis.

Luister, die Here is ons God. Hy is die enigste Here. Daarom moet ek die Here my God liefhê met hart en siel, met al my krag.