Preek 13 Januarie 2013

Jesaja 62 : 1-5

In die laaste dae van die 2de Wêreldoorlog het ‘n lid van die Italiaanse weerstandsbeweging alleen in die tronk gesit. Hy was moeg, honger en seer, want hy was erg gemartel. Dit het vir hom gevoel asof almal van hom vergeet het. Hy het nie alle hoop verloor.

Skielik een nag, maak die wag sy sel se deur oop. Met ‘n paar vloek en skelwoorde daarmee saam, gooi die wag ‘n hele brood na die man se kant toe. Teen die tyd was die man al doodhonger, so hy gryp die brood en skeur dit oop. Binne-in die brood ontdek hy toe ‘n boksie vuurhoutjies en ‘n stukkie papier. Hy steek toe een van die vuurhoutjies aan die brand en in die lig lees hy ‘n enkele woord op die stukkie papier: “coraggio”.

Coraggio beteken “hou moed”.

Hierdie een woord op ‘n stukkie papier het hom laat besef: “moenie opgee nie, moenie ingee nie. Ons het nie van jou vergeet nie. Ons probeer jou help.

Dis presies wat Jesaja 62: 1-5 ook wil doen. Dit gee hoop en moed.

Aan die begin van die jaar is ons uitgerus en weer lus vir alles. Alhoewel ons so ‘n bietjie onseker is oor die jaar wat voorlê is ons ook vol afwagting vir alles wat voorlê. Dalk begin jy met ‘n nuwe werk, nuwe vooruitsigte, dinge wat jy beplan vir die jaar. Goed wat jou opgewonde maak. Ons is vol moed en hoop vir die jaar wat voorlê. Ek hoop dat Jesaja 62 vir ons sal help om vol te hou met hierdie moed en hoop. Want dis maklik om hoop en moed te verloor.

In Jesaja se tyd het die mense van Jerusalem verstote en verlate gevoel. Hulle was platgeslaan en het hoop verloor. Hierdie woorde is dus bedoel as goeie nuus, om vir hulle weer hoop te gee. 

Om hierdie hoop te bevestig gebruik hy ‘n metafoor van lig om te wys hoe die heerlikheid van die Here sal inbreek in die donkerte van hulle moedeloosheid. Dis soos die dag wat breek na die lang donker nag of soos wanneer ‘n mense ‘n fakkel aansteek of ‘n lig aansit in die donkerte. God se lig sal hulle moedelose lewens weer verlig.

‘n Storie om dit te verduidelik. Dis ‘n ware verhaal van Johnny, ‘n 19-jarige downsindroom jongman wat as ‘n pakker in ‘n groot kruidenierswinkel gewerk het. Die mense van die winkel het eendag ‘n vrou, Barbara Glanz genooi om met die werkers te kom praat. Sy praat toe oor die invloed wat mens het op ander mense en hoe ‘n mens ‘n verskil kan maak. Omtrent ‘n maand later het Johnny vir Barbara gebel om te sê dat hy van haar praatjie gehou het. Hy het baie gaan dink oor wat hy kan doen om iets spesiaals vir die kliënte van die winkel te doen. Toe kry hy die idee om elke aand ‘n gedagte vir die dag te vind wat hy die volgende dag vir die mense kan gee. Iets positiefs wat mense se dag sal ophelder of hulle sal laat beter voel.

Elke aand het sy pa hom toe gehelp om die gedagte vir die dag 6 keer op ‘n bladsy te tik en dan het hulle 50 bladsye gedruk. Hy het dan met ‘n skêr 300 kopieë uitgeknip en sy naam op elkeen geskryf.

Elke keer as hy iemand kruideniersware in die sakke gepak het, dan het hy die gedagte vir die dag binne-in die laaste sak gesit. Dan het hy die persoon in die oë gekyk en vir hulle gesê: “Ek het ʼn “gedagte vir die dag” in jou sak gesit. Ek hoop dit help jou om ʼn goeie dag te hê. Dankie dat jy hierheen gekom het.”

‘n Maand later het die winkelbestuurder vir Barbara gebel en vir haar gesê: “Barbara, jy sal nie glo wat gebeur het nie. Ek het my rondtes gedoen en toe by die kassierpunte kom, was die ry waar Johnny gewerk het 3x langer as enigiemand sin. Dit het gestrek tot by die gevriesde kosafdeling!”

Die bestuurder het toe begin reël dat daar nog meer kasregisters oopgemaak word, maar die mense wou nie uit Johnny se ry skuif nie. Hulle wou in Johnny se ry wees. Een vrou het selfs gesê dat sy vroeër net eenkeer ‘n week na die winkel toe gekom het, maar nou kom sy elke dag om Johnny se gedagte vir die dag te kry. 

Johnny het nie net sakke gepak nie – hy was ‘n pakker van hoop. Hy het vir mense hoop gegee.

Jesaja herinner alle gelowiges daaraan dat ons pakkers van hoop moet wees. Dis maklik om te fokus op die negatiewe en om heeltyd krities te wees. Kom ons wees eerder mense wat in 2013 positiwiteit en hoop sal gaan uitdeel.

Kom ons kyk gou watter gedagtes vir die jaar kan ons nog uit hierdie teks saamneem.

Die eerste gedagte kry ons in vers 3:

“Die Here sal jou soos ʼn sierlike kroon in Sy hand hou, jou God sal jou soos ʼn koninklike tulband vashou.” (vs 3)

Die beelde van krone en tulbande wat hier gebruik word is beelde wat hoort by ‘n koninklike troue. ‘n Troue waar net die beste voorgehou word. Jerusalem word God se kroon en tulband egnoem. Hy hou haar in sy hand. Hy versorg en beskerm haar. Sy is nie meer die verstote vrou nie.

Die eerste gedagte van die jaar is dat God op dieselfde manier na my en jou kyk. Ons is vir Hom soos ‘n kroon en ‘n tulband. Hy hou ons in Sy hand, hy versorg en beskerm ons. Ons is vir hom kosbaar.

Dink gou ‘n oomblik. Wat doen die woorde aan jou? Hoe laat dit jou voel oor jouself? Onthou dis God wat dit vir jou sê!

Die tweede gedagte vir die jaar kry ons in vers 2, 4:

“Jy sal ‘n nuwe naam kry, ‘n naam wat die Here self vir jou gekies het.”

“Jy sal genoem word: “Die een vir wie die Here liefhet…die een wat aan die Here behoort ”

In die Bybel sien ons baie keer, wanneer God mense se lewens verander of as hy vir hulle ‘n spesifieke roeping het, dan word hulle name ook verander. Abram wat Abraham word, Jakob wat Israel word, Saulus wat Paulus word. Dit was ‘n gebruik van daardie tyd.

Jesaja praat hier van Jerusalem wat ‘n nuwe naam gaan kry. Hulle is nou nie meer die mense wat verstoot is nie, wat sonder hoop is nie. Hulle is die mense vir wie die Here lief is en wat aan Hom behoort.

Dis soos ons ook lees in Sefanja 3: 17 “Die Here jou God is by jou. Hy is vol vreugde oor jou, Hy is stil-tevrede in sy liefde. Hy jubel en juig oor jou”

Julle het seker al gehoor van Norman Vincent Peale. Daar word vertel dat hy eenkeer in ‘n preek gesê het dat daar nêrens in die Bybel ‘n plek is waar God iemand label as ‘n sondaar nie. Hy het ook gesê dat Jesus nooit enigiemand ‘n sondaar genoem het nie. Robert Schuller, bekende TV prediker en skrywer wat die Crystal Cathedral in Californië begin het, het dit gehoor en gedink dat dit mos nie waar kan wees nie. Hy het toe sy Bybel gevat en dit gaan navors en ontdek dat Norman Vincent Peale reg was. Nêrens  label Jesus ooit iemand as ‘n sondaar en ‘n mislukking nie.

Ek kan ook nie aan een plek dink waar Jesus dit doen nie. Hy sou wel vir iemand bv sê om nie meer te gaan sondig nie, maar hy het nooit mense as sondaars gelabel nie. Hy het altyd positief gepraat en mense opgebou. Hy het mense gelabel as vergeefde mense, as nuwe mense.  

Dis die 2de gedagte vir die jaar. Jy behoort aan die Here. Hy is lief vir jou. Hy is vol vreugde oor jou. Hy is stil-tevrede met jou. Hy jubel en juig oor jou. Hy label jou as iemand wat vergewe is en as ‘n nuwe mens.

So gaan 2013 in as iemand wat weet dat jy vir God kosbaar is.

As iemand wat weet dat Hy vol vreugde is oor jou. Ge-label as ‘n nuwe mens.

En leef in hierdie jaar as ‘n pakker van hoop. Iemand wat vir ander mense hoop gee.