Preek 13 May 2012

Die liefde is onselfsugtig

1 Korintiers 13: 4, 5

Ons praat oor die verskillende gestaltes van Agape-liefde. Ons het al gepraat oor agape-liefde wat geduldig en vriendelik is. Liefde wat saam met die waarheid loop. Verlede week het gegaan oor liefde wat vergewe. Vandag praat ons oor Agape-liefde wat onselfsugtig is. 

Dis vir my nogal gepas dat ons op Moedersdag praat oor die liefde wat onselfsugtig is. Ek dink ‘n ma is die beste voorbeeld van onselfsugtigheid.

“The natural state of motherhood is unselfishness. When you become a mother, you are no longer the center of your own universe. You relinquish that position to your children.”

(Jessica Lange)

1 Kor 13:4, 5 “Die liefde…is nie afgunstig nie, is nie grootpraterig nie, is nie verwaand nie… soek nie sy eie belang nie…

“Die liefde is…om ander mense dit wat hulle het of kry te gun sonder om lelik te wees as hulle dinge het wat jy nie het nie; om nie heeltyd oor jouself te praat en te spog nie; om nie heeltyd te maak asof jy soveel beter as ander mense is nie;...om nie net heeltyd aan jouself en jou eie voordeel te dink nie;” (Die Boodskap)

Al die goed wat ons in hierdie teks lees - nie afgunstig nie, nie grootpraterig nie, nie verwaand nie, soek nie eie belang nie – is eienskappe van liefde wat onselfsugtig is. So ek wil so vining iets oor elkeen van hulle sê.

Is nie afgunstig nie

Wanneer kinders klein is, dan sukkel hulle mos om te deel. Hulle wil tog net nie hê hulle maatjies moet met hulle speelgoed speel nie – myne, myne, myne.  As hulle ouer word, dan moet jy tog net seker maak jy behandel albei dieselfde, gee vir altwee dieselfde goed sodat die een nie veronreg voel nie.

By volwassenes sien mens dit ook, net op ‘n ander manier – wanneer iemand bo jou gekies word vir ‘n bevordering. Wanneer iemand meer geld verdien, of ‘n nuwe kar koop. Mense is afgunstig of jaloers teenoor mekaar. Iemand anders moet tog net nie beter wees as ek of meer hê as ek nie.

Daar is 2 soorte afguns: die een soort is wanneer mense ander mense se besittings begeer. Maar die ander soort is veel erger en gevaarliker. Dis wanneer jy nie kan verdra dat ander mense dinge het of prestasies bereik wat jy nie het nie. Jy wens dus nie die dinge soseer vir jouself nie, jy wens dat die ander persoon dit nie het nie. Jy kan dit nie net gun vir die ander persoon en saam met hulle bly wees nie – jy wens hulle het dit glad nie.

FB Meyer was die predikant van die Westminster Chapel in London. Dit was in dieselfde omgewing as die Christ Church waar Cambell Morgan die predikant was en die Metropolitan Chapel waar Charles Spurgeon die predikant was. Hulle was albei baie bekende predikers so hulle het groot skares getrek. FB Meyer was dikwels gepla deur gevoelens van afguns en jaloesie. Hy vertel dat hy eers vrede gekry het toe hy begin het om vir sy kollegas te bid. Hy getuig:  “When I prayed for their success, the result was that God filled their churches so full that the overflow filled mine, and it has been full ever since.”

Ons gaan net vrede kan kry as ons wegbeweeg van ‘n Ek-fokus, na ‘n Jy-fokus. Wanneer ek nie meer afgunstig is op ander mense nie, maar ander mense goeie dinge kan gun.

Is nie grootpratering nie

Mac Davis het ‘n liedjie geskryf: “O, Lord, it’s hard to be humble”. Die koor gaan so:

Oh Lord it's hard to be humble when you're perfect in every way.

I can't wait to look in the mirror 'cos I get better looking each day

to know me is to love me I must be a hell of a man.

O Lord it's hard to be humble but I'm doing the best that I can.

“Come over here and sit next to me, I’m dying to tell you all about myself.” (Oscar Wilde)

Grootpraterige mense is selfversekerde mense wat teveel van hulleself dink. Dis mense wat soms God wil speel en ander mense se lewens wil beheer. Dis mense wat al die antwoorde het en dit baie maklik en met baie selfvertroue met almal wil deel. In Engels is daar ‘n mooi word daarvoor om so iemand te beskryf: “self righteous”  (selfvoldaan)

Petrus was ‘n goeie voorbeeld hiervan. Hy was baie grootpraterig en selfversekerd oor sy geloof…en toe kraai die haan drie keer. En daarna was hy baie nederiger.

“Be humble; you will like yourself that way and so will other people.”  

Is nie verwaand nie

Dit sluit aan by die vorige punt.

Onthou julle vir Tom Selleck, wat in die 80’s die hoofrol gespeel het in die TV reeks Magnum PI. Hy was op daardie stadium die hoogs betaalde akteur op TV.

Hy vertel: “Wanneer ek al te vol van myself raak, onthou ek die vriendelike, bejaarde paartjie wat in 'n straat in Honolulu met ’n kamera na my toe aangeloop gekom het. Toe ek gaan staan dat hulle my kan afneem, sê die man: ‘Nee, nee, ons wil hê jy moet óns afneem.”

Romeine 12: 16 sê: “ Moenie hooghartig wees nie, maar skaar julle by die nederiges.”

Soek nie sy eie belang nie

Mense wat die hele tyd hulle eie belang soek is soos passers – alles draai net om hulleself. Dis soos die broer en suster wat saam op ‘n hobbelperdjie( rocking horse) gery het totdat die boetie later vir sy sussie sê: “as een van ons nou van hierdie perdjie afklim, dan is daar meer plek vir my”.

Wanneer ek besef dat dinge nie net oor my belange gaan nie – dan kan ek ophou worry oor wat ander mense van my dink. Dan hoef ek nie altyd die laaste woord te probeer inkry nie. Dan is dit nie belangrik dat almal dinge moet sien en moet doen soos wat ek dit wil hê nie. Dan besef ek ook, die wêreld skuld my niks.

Agape-liefde weet daar is meer in hierdie lewe as ekself en my eie belange en behoeftes. Dit neem ook ander se belange ernstig.

 

Soos ek aan die begin gesê het – die 4 goed is eienskappe van die liefde wat onselfsugtig is. As dus net kan opsom: liefde wat onselfsugtig is - is nie afgunstig nie, maar gun mense goeie goed; is nie grootpraterig en verwaand nie, maar nederig en minder selfversekerd en selfvoldaan; soek nie net my eie belang nie, maar ook die van ander.